Коронавирус: Францияда кунига 10 минг янги ҳолат, Испанияда малика карантинда

Европада коронавирусдан зарарланганлар сони тезлик билан ўсишда давом этмоқда. Францияда сўнгги бир кунда Covid-19’га чалиниш билан боғлиқ ҳолатлар бўйича рекорд қайд этилди, шунингдек, Испания ва Чехияда ҳам касаллик янги куч билан авж олган.

Жонс Ҳопкинс университети маълумотларига кўра, бутун дунёда Covid-19 билан касалланганлар сони 28,7 миллиондан ошган, 920,8 минг бемор вафот этган. Пандемия даврида 19,4 млн киши касалликка чалиниб тузалган.

Шанба куни француз ҳукумати сўнгги бир кунда 10561та янги ҳолатлар аниқлангани ва бу бир кун аввалгидан мингтага кўплиги ҳақида хабар берди. Шунингдек, шифохоналарнинг жонлантириш бўлимларига ётқизилган беморлар сонида ҳам ўсиш кузатилган.

Шу туфайли мамлакатдаги таниқли шифокорлар гуруҳи аҳолини учрашувларга боришдан тийилишга чақирган. «Хурсандчилик билан ўтказилган ёздан кейин яна эҳтиёткор бўлиш вақти келди», дейилади якшанба куни Le Journal du Dimanche журналида нашр қилинган мақолада. «Хона қанчалик кичик ва қанчалик кўп одам бўлса, у ерда ҳаво кам, вирус юқтириб олиш эҳтимоли кўп бўлади», дея эслатишади мутахассислар.

Июнь ойида Францияда касалланиш ҳолатлари барча ёш тоифаларида ўсди, аммо ҳукумат айниқса ёшлар орасида касалланиш ҳолатлари кескин кўпайганини маълум қилди.

Франция - Европадаги касаллик яна авж ола бошлаган ягона мамлакат эмас.

Қитъадаги барча давлатлар ҳукуматлари март ойида жорий этилган карантин чораларини босқичма-босқич юмшата бошлагач, август ойида касаллик яна авж ола бошлади.

Франциядан сўнгги маълумотлар
Шанба куни Франциядаги шифохоналарга коронавирус ташхиси қўйилган 2432 бемор ётқизилди, бу эса бир кун олдин шифохоналарга олиб келинган беморлар сонидан 75 нафарга кўп. Оғир аҳволда бўлган 417 киши жонлантириш бўлимига жойлаштирилган, бу бир кун олдинги кўрсаткич билан таққослаганда 28 нафарга кўп.

Сўнгги бир кунда мамлакатда 17 киши коронавирус қурбони бўлди. Пандемия даврида Францияда ушбу касалликдан вафот этганлар сони 30 мингдан ошган - бу дунёда еттинчи кўрсаткич.

Мамлакат ҳукумати 42 ҳудудни «қизил ҳудудлар» сифатида белгилаган. Вирус тарқалиши авж олган бу ҳудудларда жамоат жойларида ниқобда юриш мажбурий қилинган. Бундай ҳудудлар сирасига Париж, Лион ва Франциянинг Ўрта ер денгизи қирғоқлари яқинидаги барча шаҳарлар киради.

Яқинда коронавирусга тест топширишига тўғри келган бош вазир Жан Кастекс Бордо, Марсель ва Гваделупа ороли расмийларини душанба кунидан инфекция тарқалишининг олдини олиш мақсадида «қатор қўшимча чоралар» жорий этишга чақирган.

«Тур де Франс» ташкилотчилари томошабинлар старт ва финиш ҳудудларида бўлишни тақиқлашган.

Европанинг бошқа давлатларидаги вазият
Европанинг яна бир қатор давлатларида коронавирус тарқалиши тезлашган.

Якшанба куни Чехияда кунлик ҳолатлар бўйича янги рекорд қайд этилди - 1541 ҳолат.

Қўшни давлатлар Чехиядан келувчилар учун чекловлар жорий этишмоқда. Чоршанба кунидан Германия Прагадан келувчиларнинг барчаси учун коронавирусга тест топширишни талаб қилади.

Ўтган пайшанба куни Испанияда кунлик ўсиш ҳолатлари бўйича энг юқори кўрсаткич қайд этилганди, мамлакат соғлиқни сақлаш вазирлиги вазият барқарорлигини маълум қилган бўлсада, ўша куни 10 минг 764 кишида касаллик аниқланганди.

Испания Европада коронавирусга чалинганлар сони бўйича ҳамон етакчиликни сақлаб қолмоқда: пандемия бошидан буён бу ерда 566,3 минг киши касалланган, 29,7 минг киши вафот этган.

Испан тахтининг 14 ёшли вориси, Астурийская маликаси синфдошларидан бирига Covid-19’га чалиниш ташхиси қўйилгач, карантинга олинди. Эндиликда Мадриддаги Санта-Мария-де-лос-Росалес мактабининг барча ўқувчилари коронавирусга тест топширишади.

Британияда дам олиш кунларида кунлик ўсиш ҳолатлари 4 мингга чиқди, мамлакатда яна кўпчилик бўлиб йиғилиш тақиқланган. Англия ва Шотландияда энди 6 нафардан кўп бўлиб йиғилиш мумкин эмас.